ఎల్కతుర్తి మండలం కేంద్రంలో ఆశా వర్కర్ల యూనియన్ అధ్యక్షురాలు కేంసారపు సంధ్య ఆధ్వర్యంలో
ఆశా వర్కర్లకు రూ.18 వేల ఫిక్స్‌డ్ వేతనం కల్పించాలి!
డిమాండ్లు పరిష్కరించకపోతే డిసెంబర్ 15 నుంచి నిరవధిక సమ్మె
భీమ్ ఇండియా టుడే న్యూస్ ఎల్కతుర్తి మండలం హన్మకొండ జిల్లా లో రాష్ట్రవ్యాప్తంగా ప్రజారోగ్య పరిరక్షణలో కీలక పాత్ర పోషిస్తున్న ఆశా వర్కర్లకు ప్రభుత్వం న్యాయం చేయాలని ఆశా వర్కర్లు డిమాండ్ చేస్తున్నారు.
గత 20 సంవత్సరాలుగా గ్రామీణ ప్రాంతాల్లో ప్రజలకు ఆరోగ్య సేవలు అందిస్తూ, గర్భిణులు, బాలింతలు, చిన్నారుల ఆరోగ్య పరిరక్షణతో పాటు ప్రభుత్వ ఆరోగ్య పథకాలను ప్రజల్లోకి తీసుకెళ్తున్న ఆశా కార్యకర్తలకు తగిన వేతనాలు, ఉద్యోగ భద్రత లేకపోవడం బాధాకరమని వారు ఆవేదన వ్యక్తం చేస్తున్నారు.
ప్రభుత్వం ఆశా వర్కర్లతో అనేక రకాల పనులు చేయించుకుంటున్నప్పటికీ, వారి శ్రమకు తగిన గుర్తింపు, ఆర్థిక భద్రత కల్పించడం లేదని విమర్శించారు. ప్రస్తుతం అందుతున్న పారితోషికంతో కుటుంబాలను పోషించుకోవడం కూడా కష్టంగా మారిందని తెలిపారు.
ఆశా వర్కర్ల ప్రధాన డిమాండ్లు:
ఆశా వర్కర్లకు నెలకు రూ.18,000 ఫిక్స్‌డ్ వేతనం నిర్ణయించాలి.
పీఎఫ్, ఈఎస్ఐ సౌకర్యాలతో పాటు ఉద్యోగ భద్రత కల్పించాలి.
రూ.50 లక్షల ఇన్సూరెన్స్, రూ.50 వేల ప్రసూతి ఖర్చులు కల్పించాలి.
రిటైర్మెంట్ బెనిఫిట్ కింద రూ.5 లక్షలు చెల్లించాలి. పారితోషికంలో సరైన పెంపుదల ఉండాలి.
ప్రతి ఆదివారం, పండుగలకు సెలవులు, సంవత్సరానికి 20 రోజుల క్యాజువల్ సెలవులు, ఆరు నెలల ప్రసూతి సెలవులు కల్పించాలి.
ఆశా వర్కర్లకు సామాజిక భద్రత, పెన్షన్ సౌకర్యాలు కల్పించాలి.
గతంలో పలుమార్లు ప్రభుత్వానికి వినతిపత్రాలు అందించినప్పటికీ సమస్యలు పరిష్కారం కాలేదని ఆశా వర్కర్లు పేర్కొన్నారు. ఇప్పటికైనా ప్రభుత్వం స్పందించి తమ న్యాయమైన డిమాండ్లను పరిష్కరించాలని కోరారు.
లేనిపక్షంలో **2026 డిసెంబర్ 15 నుంచి నిరవధిక సమ్మె చేపడతామని** ప్రభుత్వాన్ని హెచ్చరించారు.
ఆశా వర్కర్ల సమస్యల పరిష్కారానికి ప్రజా సంఘాలు, కార్మిక సంఘాలు, ప్రజాస్వామికవాదులు మద్దతుగా నిలవాలని ఈ సందర్భంగా విజ్ఞప్తి చేశారు.
ప్రజల ఆరోగ్యం కోసం నిరంతరం పనిచేస్తున్న ఆశా వర్కర్ల కుటుంబాల ఆరోగ్య భద్రత, ఆర్థిక భద్రతను ప్రభుత్వం పట్టించుకోవాలి. మా శ్రమకు తగిన గుర్తింపుగా రూ.18 వేల ఫిక్స్‌డ్ వేతనం ప్రకటించాలి. మా న్యాయమైన డిమాండ్లు పరిష్కరించకపోతే డిసెంబర్ 15 నుంచి నిరవధిక సమ్మెకు దిగుతాం.
కేంసారపు సంధ్య మరియు ఎలుకతుర్తి మండలం ఆశ వర్కర్లు 28 మంది ఆవేదన వ్యక్తం చేశారు
