సెక్షన్‌ 22ఏ జాబితాలోని ఇళ్లు, ఓపెన్‌ ప్లాట్లకు రిజిస్ట్రేషన్లకు మార్గం సుగమం
భీమ్ ఇండియా టుడే న్యూస్ హైదరాబాద్: తెలంగాణలో నిషేధిత జాబితా (సెక్షన్‌ 22ఏ)లో ఉన్న ఇళ్లు, ఓపెన్‌ ప్లాట్ల రిజిస్ట్రేషన్లకు ప్రభుత్వం అనుమతి కల్పించింది. GHMC, HMDA, DTCP అనుమతులు పొందిన ఆస్తుల రిజిస్ట్రేషన్లకు ఉన్న అడ్డంకులను తొలగిస్తూ ప్రభుత్వం కీలక నిర్ణయం తీసుకుంది.
264 కాలనీలకు వెసులుబాటు
రెవెన్యూ శాఖ ముఖ్య కార్యదర్శి లోకేశ్‌కుమార్ గురువారం రాత్రి ఈ మేరకు ఉత్తర్వులు జారీ చేశారు. తాజా నిర్ణయంతో రంగారెడ్డి జిల్లాలో 44, మేడ్చల్‌-మల్కాజ్‌గిరి జిల్లాలో 65తో పాటు రాష్ట్రవ్యాప్తంగా మొత్తం 264 కాలనీల్లో అర్హత కలిగిన ఆస్తుల రిజిస్ట్రేషన్లకు మార్గం సుగమమైంది.
కోర్టు స్టే ఉన్న ఆస్తులకు వర్తించదు
అయితే కోర్టు స్టే ఉన్న ఆస్తుల రిజిస్ట్రేషన్లు మాత్రం నిలిపివేయనున్నారు. సంబంధిత నిబంధనలు, కోర్టు ఆదేశాలను అనుసరించి ఆయా ఆస్తులపై తదుపరి చర్యలు తీసుకోనున్నారు.
జిల్లా స్థాయి కమిటీలు
నిషేధిత ఆస్తులకు సంబంధించిన సమస్యలను పరిష్కరించేందుకు జిల్లా స్థాయి కమిటీలను ఏర్పాటు చేయాలని ప్రభుత్వం నిర్ణయించింది. సంబంధిత రికార్డులను పరిశీలించి, అర్హత కలిగిన ఆస్తులపై నిర్ణయం తీసుకునే అవకాశం ఉంది.
ప్రభుత్వ నిర్ణయంతో ఉపశమనం
ఈ నిర్ణయంతో నిషేధిత జాబితాలో ఆస్తులు ఉండటంతో రిజిస్ట్రేషన్లకు ఇబ్బందులు ఎదుర్కొంటున్న యజమానులు, కొనుగోలుదారులకు ఉపశమనం కలిగే అవకాశం ఉంది.
