అర్ధరాత్రి ఏటీఎంను పగలగొట్టిన గుర్తుతెలియని దుండగులు.. ఘటన స్థలానికి చేరుకున్న పోలీసులు
భీమ్ ఇండియా టుడే న్యూస్ కరీంనగర్ తిమ్మాపూర్: కరీంనగర్ జిల్లా తిమ్మాపూర్ స్టేజీ వద్ద ఉన్న స్టేట్ బ్యాంక్ ఆఫ్ ఇండియా (ఎస్బీఐ) ఏటీఎంలో గుర్తుతెలియని దుండగులు చోరీకి పాల్పడిన ఘటన ఆదివారం వెలుగులోకి వచ్చింది. అర్ధరాత్రి సమయంలో ఏటీఎం కేంద్రంలోకి ప్రవేశించిన దుండగులు ఏటీఎం యంత్రాన్ని పగలగొట్టి నగదు చోరీ చేసేందుకు ప్రయత్నించినట్లు తెలుస్తోంది.
రాత్రి సమయంలో ఎవరూ లేని సమయాన్ని అదునుగా చేసుకున్న దుండగులు ఏటీఎంను ధ్వంసం చేసి చోరీకి పాల్పడ్డారు. అయితే ఉదయం వాకింగ్‌కు వెళ్లిన స్థానికులు ఏటీఎం పగలగొట్టి ఉండటాన్ని గమనించారు. వెంటనే పోలీసులకు సమాచారం అందించడంతో పోలీసులు హుటాహుటిన సంఘటనా స్థలానికి చేరుకున్నారు.
ఘటన స్థలాన్ని పరిశీలించిన పోలీసులు ఏటీఎం ధ్వంసమైన తీరును పరిశీలించి, చోరీ జరిగిన విధానంపై వివరాలు సేకరిస్తున్నారు. అలాగే ఏటీఎం పరిసరాల్లో ఏర్పాటు చేసిన సీసీ కెమెరాల ఫుటేజీలను పరిశీలిస్తూ దుండగులను గుర్తించే పనిలో పోలీసులు నిమగ్నమయ్యారు.
చోరీలో ఎంత మొత్తంలో నగదు అపహరణకు గురైంది అనే విషయం ఇంకా స్పష్టంగా తెలియాల్సి ఉంది. దుండగులు ఎంతమంది వచ్చారు, ఏ వాహనంలో వచ్చారు, చోరీ అనంతరం ఏ దిశగా వెళ్లారు అనే అంశాలపై పోలీసులు దర్యాప్తు చేస్తున్నారు.
ఏటీఎం పగలగొట్టిన విషయం ఉదయం స్థానికులకు తెలియడంతో తిమ్మాపూర్‌లో ఒక్కసారిగా కలకలం రేగింది. ఘటనపై పోలీసులు కేసు నమోదు చేసి, అందుబాటులో ఉన్న ఆధారాల ఆధారంగా నిందితులను గుర్తించే ప్రయత్నాలు ముమ్మరం చేశారు. పూర్తి వివరాలు పోలీసుల దర్యాప్తులో వెల్లడయ్యే అవకాశం ఉంది.
