260 మంది పేదల జీవనాధారాన్ని కాపాడాలి.. భూమి సంరక్షణ సంఘం ఆధ్వర్యంలో నిరసన
భీమ్ ఇండియా టుడే న్యూస్ ఎల్కతుర్తి: పేదల జీవనాధారంగా ఉన్న పంచరాయి భూమిని నిరుపేదలకే కేటాయించాలని, ఆ భూమిలో కేంద్ర ప్రభుత్వ పెట్రోల్ బంక్ నిర్మాణానికి కేటాయింపును పునఃపరిశీలించాలని భూమి సంరక్షణ సంఘం నాయకులు డిమాండ్ చేశారు. హనుమకొండ జిల్లా ఎల్కతుర్తి మండలం దండేపల్లి గ్రామ పరిధిలోని సర్వే నంబర్‌ 439లో ఉన్న పంచరాయి భూమిని కాపాడాలని కోరుతూ మంగళవారం దండేపల్లి హైస్కూల్ ఆవరణలో సంఘం ఆధ్వర్యంలో సమావేశం నిర్వహించి నిరసన తెలిపారు.
ఈ సందర్భంగా సంఘం అధ్యక్షుడు కామేరా లక్ష్మణ్‌ మాట్లాడుతూ.. పంచరాయి భూమిని సాగు చేసుకుంటూ సుమారు 260 మంది పేద కుటుంబాలు జీవనోపాధి పొందుతున్నాయని తెలిపారు. ఎన్నో ఏళ్లుగా ఈ భూమిపై ఆధారపడి జీవిస్తున్న నిరుపేదలకు భూమిని దూరం చేస్తే వారి కుటుంబాల ఆర్థిక పరిస్థితి దెబ్బతినడంతో పాటు జీవనాధారం కోల్పోయే ప్రమాదం ఉందని ఆవేదన వ్యక్తం చేశారు.
పేద కుటుంబాల భవిష్యత్తును దృష్టిలో ఉంచుకుని అధికారులు స్పందించాలని ఆయన కోరారు. పేదలు సాగు చేసుకుంటున్న భూమిని పెట్రోల్ బంక్ నిర్మాణానికి కేటాయించడంపై అభ్యంతరం వ్యక్తం చేస్తూ, ఈ నిర్ణయాన్ని పునఃపరిశీలించాలని డిమాండ్ చేశారు. ప్రభుత్వ అధికారులు క్షేత్రస్థాయిలో పరిస్థితులను పరిశీలించి, భూమిపై ఆధారపడి జీవిస్తున్న కుటుంబాలకు న్యాయం జరిగేలా చర్యలు తీసుకోవాలని విజ్ఞప్తి చేశారు.
పేదల హక్కులను కాపాడాలి
పంచరాయి భూమిని నిరుపేదలకే కేటాయించి తమకు న్యాయం చేయాలని భూమి సంరక్షణ సంఘం నాయకులు స్పష్టం చేశారు. పేదల జీవనోపాధికి విఘాతం కలగకుండా అధికారులు తగిన నిర్ణయం తీసుకోవాలని కోరారు. భూమి సమస్యను పరిష్కరించి 260 మంది పేద కుటుంబాల ప్రయోజనాలను కాపాడాలని విజ్ఞప్తి చేశారు.
ఈ నిరసన కార్యక్రమంలో భూమి సంరక్షణ సంఘం ఉపాధ్యక్షురాలు జూపాక రాజేశ్వరి, ప్రధాన కార్యదర్శి గడ్డం సంధ్య, గడ్డం పూలమ్మ, గడ్డం సులోచన, కమిటీ సభ్యులు అక్కు సాంబయ్య, గుంటి నారాయణ, జాజల రాములు పాల్గొన్నారు. వీరికి మద్దతుగా రేణుకుంట్ల సాంబయ్య, పింగిలి సదానందం, రాధమ్మ, సమ్మయ్య తదితరులు నిరసనలో పాల్గొని పేదల భూములను కాపాడాలని డిమాండ్ చేశారు.