బస్టాండ్‌లో దుర్వాసన దారుణం.. ప్రయాణికుల ఆరోగ్యంతో చెలగాటం

బస్టాండ్‌లో దుర్వాసన దారుణం.. ప్రయాణికుల ఆరోగ్యంతో చెలగాటం! అధికారులు వెంటనే చర్యలు తీసుకోవాలి

బీమ్ ఇండియా టుడే న్యూస్ హుజురాబాద్ పట్టణంలోని బస్టాండ్ ఆవరణలో ఉన్న ప్రజా మూత్రశాల నిర్వహణ పూర్తిగా నిర్లక్ష్యానికి గురవడంతో ప్రయాణికులు, మహిళలు, చిన్నారులు, వృద్ధులు తీవ్ర ఇబ్బందులు పడుతున్నారు. వర్షాకాలం కావడంతో మూత్రశాల పరిసరాల్లో మురుగు నీరు నిల్వ ఉండటం, చెత్త పేరుకుపోవడం, దుర్వాసన భరించలేని స్థాయికి చేరుకోవడంతో బస్టాండ్‌కు వచ్చే ప్రజలు ముక్కు మూసుకుని వెళ్లాల్సిన పరిస్థితి నెలకొంది.ప్రతిరోజూ వేలాది మంది ప్రయాణికులు రాకపోకలు సాగించే బస్టాండ్‌లో కనీస పారిశుద్ధ్య ప్రమాణాలు కూడా పాటించకపోవడం అధికారుల నిర్లక్ష్యానికి నిదర్శనమని ప్రజలు మండిపడుతున్నారు. మూత్రశాల చుట్టూ పెరిగిన పొదలు, పేరుకుపోయిన చెత్త, నిల్వ నీటి కారణంగా దోమలు, ఈగలు విపరీతంగా పెరిగి అంటువ్యాధులు వ్యాపించే ప్రమాదం ఉందని ఆందోళన వ్యక్తం చేస్తున్నారు.ప్రజలకు ఉపయోగపడాల్సిన మూత్రశాల ప్రస్తుతం దుర్వాసనకు కేంద్రంగా మారిందని, బస్టాండ్‌లో అడుగుపెట్టిన వెంటనే అసహ్యకరమైన వాసన రావడంతో ప్రయాణికులు తీవ్ర అసౌకర్యానికి గురవుతున్నారని స్థానికులు చెబుతున్నారు.

ప్రజల ఆగ్రహం

ఇంతటి సమస్య నెలకొన్నా సంబంధిత అధికారులు ఇప్పటివరకు ఎలాంటి చర్యలు తీసుకోకపోవడం పట్ల ప్రజలు తీవ్ర అసంతృప్తి వ్యక్తం చేస్తున్నారు. ప్రజల ఆరోగ్యాన్ని పణంగా పెట్టే విధంగా వ్యవహరించడం సరైంది కాదని, సంబంధిత శాఖల మధ్య సమన్వయం లేకపోవడం వల్లే ఈ పరిస్థితి ఏర్పడిందని విమర్శిస్తున్నారు.

మున్సిపల్ కమిషనర్ – డిపో మేనేజర్ తక్షణమే స్పందించాలి

మున్సిపల్ కమిషనర్, ఆర్టీసీ డిపో మేనేజర్ వెంటనే ఈ ప్రాంతాన్ని పరిశీలించి ప్రత్యేక పారిశుద్ధ్య చర్యలు చేపట్టాలని ప్రజలు డిమాండ్ చేస్తున్నారు. మూత్రశాలను ప్రతిరోజూ శుభ్రపరచడం, చెత్తను తొలగించడం, నిల్వ నీటిని తొలగించి డ్రైనేజీ వ్యవస్థను మెరుగుపరచడం, దుర్వాసన నివారణకు శాశ్వత చర్యలు తీసుకోవాలని కోరుతున్నారు.

హెచ్చరిక

ప్రజల ఆరోగ్యానికి ముప్పుగా మారిన ఈ సమస్యను అధికారులు వెంటనే పరిష్కరించకపోతే స్థానికులు, ప్రయాణికులు కలిసి ఆందోళన కార్యక్రమాలు చేపట్టేందుకు సిద్ధమవుతున్నట్లు హెచ్చరిస్తున్నారు. సంబంధిత శాఖలు ఇకనైనా నిర్లక్ష్యాన్ని వీడి తక్షణ చర్యలు తీసుకుని బస్టాండ్‌ను పరిశుభ్రంగా మార్చాలని ప్రజలు గట్టిగా డిమాండ్ చేస్తున్నారు.